| |
| |||||||
| قصص الاعضاء منتدى مخصص للقصص التي يقوم بتأليفها الاعضاء |
    |
 |
| | LinkBack | أدوات الموضوع | انواع عرض الموضوع |
08 - 03 - 2008, 05:41 PM
| #101 (permalink) |
| غلاتي ماسي   |  بعد مرور ثلاثة شهور ------ المستشفى دانه تصارخ وتصيح : قايلتلكم من الاول ما ابييييييييييييييييييييييييييه بس انتو ماتفهمون ما ابيييييييييييييييييييييييييييييه عجبكم اللي صار اكرهكم وش تبون مني اكثر خلااااااااااااااااااااااااااص خلاااااااااااااااااااااااص ارحموني ام سليمان ضمتها : يمه لا تسوين بنفسك كذا يمه هذا قدر ربك ربك كاتب كل هالشيء دانه تصيح بهدوؤ وشكلها يقطع القلب : اه اه اه اه خلاااااص اتركوني بلحالي ما ابي اشوف احد ام سليمان : طيب طيب يالله انا بطلع --- بالممر سليمان : يمه وش ام سليمان ضمت سليمان: سليمان ولد دانه مب طبيعي سليمان: وشو يمه وش فيه ام سليمان:معاق سليمان: علشان كذا هي منهاره ام سليمان: انا ما دريت الا يوم جيت تو اول ما ولدت ماقالوا لنا سليمان: هذي جوج جت دقيتوا على زوجها ام سليمان: ايه ابوك كلم ابوه جوج: اهلين هلا ماما ام سليمان: هلا جوج جوج: ماما وش فيه صوتك دانه فيها شيء سليمان: لا بس ولدها تعبان جوج: تعبان وش فيه ؟ سليمان: ....الخ جوج: ايش ياويلي ------ سعد: اصلا انت بتتزوج دانه ابراهيم: انت مره واثق وش تبي سعد: لاني ادري انك بتتزوجها ابراهيم: ترى انت مره مسويه ازمه سعد: طيب بكرا تشوف عذوب: بخ سعد: بسم الله فجعتيني عذوب: عندي لك خبر عجيب سعد: مين انا والا هو ابراهيم: الله من الميانه مره ما في ادب سعد: المهم وشو عذوب: تحت سونامي جايين ابراهيم: هههههههه بنات خالد والله غبار سعد: وعععععععععععععععع قوللهم سعد سافر طار أي شيء عذوب: لا عاد هم ميين يبونك والله ما سالوا عنك سعد: احسن ------ بيت عذرا عذرا: بالله وش رايك بفستاني فهد: يجنن طبعا ذوقي عذرا: اكيييد لو ذوقك مو حلو كنت ما تزوجتني فهد: لااااااااا مو ذوق حظي الردي اللي رماني عذرا: الله كل هذا بقلبك وساكت حرام عليك فهد: هههههههههه شفتي شلون ------- وفا تكلم غسق وفا : اللحين انت وبعدين معك ليش كذا الى متى غسق: وفاااااااااا لو سمحتي اتركيني بحالي وفا: اللحين مسويه كل هالازمه وانت ما تاكدتي هو خطب والا لا غسق: لا بس شكلهم خلاص خطبوله البنت اللي جت ذاك اليوم مره مالها داعي وواثقه من نفسها وفا: طيب عادي وحده ومعزومه اكيد بتتدخل رازه نفسها ولو هي صدق خطيبته كان قالوا غسق: الله يستر المهم انا مره اعصابي تعبانه بسكر وفا: غسق لا تاولين شيء من را سك غسق: طيب تدرين مررره ودي اقوله احبك وفا:ههههههههههه يا كثر ما قلتيها ------ ابو سليمان : سليمان تعال اسمع انا بروح للابو وبخليه هو يقول للولد سليمان: وذا المنخلف ما فز قلبه يجي يشوف ولده ابو سليمان : عاد كلن ومزاجه المهم انت خلك مع امك واخواتك سليمان: طيب ------- نجود: وين بنات نهله: ارسلتهم لبيت خالتي من زمان ما راحولها قلت ارسلهم يستانسون نجود: على قولة صدق يغيرون جو ومنها ما ينسون اهلهم نهله: ايه من جد وخالتي والله تحبهم وتستانس لا جوا نجود: ايه والله يا حبيلها خالتي حصه تجنن ---------------- بعد مرور اسبوع وفا : الو غسق: الووووووو تسمعيني الوو وفا: هلا هلا ايه اسمعك غسق: اهلين كيفك وفا: الحمدلله تمام غسق: غريبه داقه هالحزه وفا: دانه ولدت غسق: امااااااااااااااااااااااانه وش جابت وفا: ولد بس ... الخ غسق: لا ياحياتي وكيف نفسيتها وفا: يعني مو مره بس اسمعي لازم نروح نزورها اليوم او بكرا غسق: اوكي طيب انت يناسبك اليوم او بكرا وفا: ايه انا عادي انت شوفي وش يناسبك ورديلي غسق: اوكي شوي واردلك -------- نوره: سليمان البنت تحتاج ناس يدعمونها مو كل واحد خشته شكل كنكم بعزاء سليمان: انت مستوعبه الوضع مو كلو علشان الولد الحمدلله واللي قبله ماضرهم بالعكس فيه ناس صاروا فنانين واخذوا شهره بس ابوه ابوه خرطي نوره: ياما ناس اصلا ما عندهم اباء وكملوا حياتهم سليمان: الله يعين المهم يالله خلينا نروح لانتاخر نوره: من جدك انت بتتطلع هالحزه اصبر اصلا خالتي قايله تبي تروح معنا سليمان: طيب وشلون ؟ نوره: هي قالتلي لا تطلعون قبل العصر سليمان: طيب يعني بنمرها والا لا نوره: قالت لا اذان العصر صلوا فرضكم وعقب نتصل عليها سليمان: خلاص طيب اجل بروح اتروش وبلبس على بال ما ياذن نوره:طيب -------- فهد: عذرا يالله وين الغداء تراني ميت جووووووووع عذرا:طيب طيب وش بلاك اليوم فهد: تدرين اني اليوم ما افطرت ولا تقهويت ولاشيء كني صايم حالتي صعبه عذرا: الله وليش مسوي بنفسك كذا فهد: هو بمزاجي غصب عني من ضغط الشغل اليوم كرفونا كرف عذرا: تعيش وتاكل غيرها فهد: ايه ما قلت تخيلي امس من شفت وشلون وكيف شفت عذرا: عسى ما شر كل هذا مين شفت ؟ فهد: ماجد مااااااااااجد مع عياله بمحل الالعاب اللي بجنب السوبر ماركت عذرا: الله الله الصراحه تطورات ماجد هذا صاير مبدع سعد- وكل الاكل بفمه - : هذا الاب مب انت ليش مودي عياله للمحل وانت لا فهد: اقول انطم لا يجيك شيء بحياتك ما شفته يا بايخ عذرا: اللحين كل شيء سواه ابوك بحياته لك واخرتها تقول هالكلام فهد: ياكل ويجحد ذا الولد هو و بطنه واحد سعد: انا طيب اوريكم ------ غسق : الو هلا وفا: اهلين هاه وش صار غسق: خلاص اوكي اليوم بس متى وفا: وش رايك كذا بعد على 4 ونص نطلع غسق: خلاص اوكي زوجك بيجيبك ؟ وفا: ايه غسق: طيب اسمعي وش رايك نطلع عقبها نتقهوى وفا: خلاص اسال واشوف غسق:طيب ----- سليمان : هاه وش صار ؟ نوره: لا خلاص خالتي بتجي مع جوج سليمان: يالله اجل خلينا نطلع نوره: اوكي سليمان : الا عمتي متى بتجي نوره: بكرا ان شا الله احجزت هي وابوي بس خواتي ما راح يجون سليمان: اريح بصراحه خواتك علل نوره: لا صريح مره سليمان: وش تبين اكذب عليك نوره: لا لا تكذب ----- ممدوح: الو هلا ابراهيم ابراهيم: اهلا سيد ممدوح اخبارك ممدوح: الحمدلله تمام وش طريت عليك متصل ابراهيم: ابدا ولا شيء بس مشتاقلك ممدوح: تشتاقلك العافيه ابراهيم: ممدوح بصراحه ابغى اسالك صدق اختك سليمان ولدت ممدوح: والله ما ادري انا ما كلمته من فتره ابراهيم: طيب ممكن طلب ممدوح:ههههههه تبيني اتاكد ابراهيم: ايه ممدوح: خلاص من عيوني اكلمه واقولك ابراهيم: اوكي استناك |
|  |
|
08 - 03 - 2008, 05:42 PM
| #102 (permalink) |
| غلاتي ماسي | ------- المستشفى سليمان: اهلا اهلا دانه: هلا كيفك سليمان : الحمدلله تمام وانت كيفك اللحين دانه: الحمدلله نوره: اهلين كيفك دانه: الحمدلله نوره: لا مين اليوم احسن بكثير هاه اتصل احد قال بيجي دانه: ما ادري بس انا ابغى اطلع من المستشفى ما ابغى احد يزورني بالمستشفى نوره: اها دانه: بس وفا وغسق بيجون سليمان – ابتسم – نوره: صديقاتك صح ؟ دانه: ايه نوره: متى ؟ دانه: ما ادري ------ ام سليمان : جوج وينك يالله ترى تاخرنا جوج قسم بالله 10 دقايق ان ما وصلتي بروح وبخليك ابوسليمان: لا الحرمه مستقويه وش عندك معصبه عالبنت ام سليمان : زاد قهرتني لي ساعه ادق عليها وتقولي قريبه قريبه وخرطي للحين ما جت ابو سليمان : عاد جوج ام النصب جوالك يرن ام سليمان: هذي جوج يالله مع السلامه الا اقول منتب جاي ابو سليمان : يمكن اجي بالليل اللحين مانيب فاضي ام سليمان : طيب براحتك ------- سليمان: الو اهلين ممدوح الحمدلله تمام وانت اخبارك انا بالمستشفى اختي والده الله يبارك فيك عقبالك والا اقول اعرس اول عقب جب عيال ههههههههههه طيب بالسلامه نوره: ياحليله هالممدوح طيوب يجنن ياليت لو ياخذ وحده من خواتي سليمان: وش رايك اقوله نصير انا وياه عدايل نوره: والله وناسه ام سليمان: السلام عليكم الكل : وعليكم السلام جوج: اهلين كيفك – وتقولها قمه في الرقه والحنيه – دانه: الحمدلله جبتي فتون ؟ جوج: ايه جبتها اللحين جايه وراي ام سليمان: هاه يمه وشلونك اليوم احسن دانه: زي امس زي بكرا لا جديد ام سليمان: ربك كريم على فكره ترى قلنا للناس بس ما فيه زياره بالمستشفى وانا كلمت الدكتوره وقالتلي عادي تطلعين بكرا او بعده بس الولد بيجلس عندهم زياده دانه: ياخذونه لهم اذا بغوا ام سليمان: دااااانه قسم بالله لو تعيدين هالكلام بقصد او بدون قصد لاوريك شغلك فاهمه جوج: وهذي فتون جت وشوفي وش جايبه --- داخله شايله سله صعنطوطه على قدها فيها ورود لونها زهر رفعتها جوج للسرير جوج تهمس باذن فتون قولي لخاله دانه مبروك فتون : مبوك دانه- ابتسم - : الله يبارك فيك ان شا الله انت تكبرين وتجيبين بيبي واجي انا لك واجيبلك ورد واقولك مبروك فتون: بابي بيبي يصيح وععععععع جوج: ايه والله صادقه المبزره بثاره وصياح وغثاء نوره: كلنا نقول نفس الكلام بس هذي سنة الحياة سليمان : اقول بلا نصب الا كل وحده تسرد مبزره علشان تربط الرجال لا يروح والا يفكر يعرس عليها ام سليمان: الله واكبر جبنا والا ما جبنا انتم مو مقصرين سليمان: بس ولو الرجال لا صار وراه عايله والتزامات يخفف خرابيط طبعا اللي راعي خرابيط بس المؤدب اللي مثلي ابدااااااااا ---- دانه: الو هلا اوكي ايه صح الرقم . جوج افتحي الباب وفا وغسق جو سليمان : عن اذنكم --- سليمان توه طالع من الغرفه والسيب فااااااااااضي الا بثنتين واقفين ولا انتبهوا ان فيه احد غسق : هي حلو مكياجي وفا: ايه حلو بس مره خفيف غسق: ايه عيب جاينين نزورها والبنت تعبانه بعدين انا حلوه بدون شيء وفا: ايه طيب لا تنسين تتعطرين غسق: ولا يهمك وفا: الله وشو عطرك غسق: ستلا وريني اشم عطرك وانت حلو وشو وفا: ديور غسق: تصدقين ياليت فيه ستاره علشان يمدينا نفك الطرح ونصلح شعورنا وفا: عليك اختراعات عجيبه اقول بس تاخرنا لنا ساعه داقين عالبنت غسق: الله من التهاويل يالنصابه سااااااعه وفا: اقول اخلصي --- سليمان مر لعانه بتفرج على ذا المخبل اللي واقفين بنص السيب وكنه بيت ابوهم وفا: ياويلي يسطل غسق: حسبي الله عليك هذا وانت متزوجه تقولين هالكلام اجل انا وش اقول وفا: شوفي عند الجمال ما فيه متزوجه او عزباء بعدين انت خلك بممدوح اصرف غسق: ايه والله يقبر فلبي يهبل يجنن ياناس قلبوس وفا: ههه خقت البنت بعدين يجنن من ... والا اسكت احسن غسق: اقول عاد الزمي حدودك احسنلك يالله ادخلي ------- ام ابراهيم : بالله ما شا الله اللحين اخت سليمان ذيك الصغير تزوجت وصارت ام بعد يالله يالدنيا الا انت وش دراك ابراهيم: هووو يمه من سليمان ام ابراهيم: ما شا الله عاد تستاهل ذيك البنت حلوه الا هي من متزوجه ابراهيم: تطلقت ترى ام ابراهيم : عمى ما يعبي عيونكم شيء يالرجال اجل هذيك الزينه تتطلق ابراهيم: عاد نصيبها ام ابراهيم: ايه والله صادق هالطلاق صاير عندنا مثل السلام عليكم ابراهيم: حال الدنيا الله يستر علينا ------- وفا : الحمدلله عالسلامه غسق: الحمدلله عالسلامه ومبروك دانه: ما اقدر اقول عقبالكم اكيد ما اتمنى لكم اللي صار لي غسق: دانه من جدك وش هالحكي مو انت اللي تقولين هالكلام انت انسانه فاهمه وفا: حرام عليك اللي تسوينه بنفسك قدر ومكتوب ما احد يختار اللي بيصيرله دانه: تعالوا اصفقوني احسن وفا:هههههههههه ودي ام سليمان : كيفك وفا وش اخبارك وفا: الحمدلله تمام ام سليمان: واخبارك مع الزواج وفا: اه ما شي الحال الحمدلله والله تعب ومسؤليه ام سليمان : الله يعينك هاه غسق وانت شخبارك عاد انت كم لنا ما شفناك غسق : الحمدلله انا على حطت يدك ماتغيرت جوج: تفضلوا تشرفوا ببنتي فتون وفا وغسق : ما شا الله تجنن دانه: معليش ما عرفتكم هذي نوره زوجة سليمان اخوي وفا: هلا والله غسق: اهلا نوره: هلا فيكم ------- ماجد : عذوب عذوب: هلا ماجد: وش رايك نسافر مكه هالاسبوع انا وانت والعيال عذوب: والله فكره حلوه ما عندي مانع ماجد: خلاص اجل احجزلنا فندق وتذاكر واذا تبي خالتي تروح معنا ترى عادي حياها الله عذوب: امي ما اتوقع بس اسالها مو مشكله بس وش طرى عل بالك هالفكره ماجد: ابد شفت تو صلاة المغرب واحس قلبي فز اروحلها ناسي متى اخر مره رحت عذوب – بقلبها – الله يتمم عليك ------ ابو سليمان : هلا ام سليمان هاه عندكم احد والا اجي ايه خلاص اجل ابجي انا وسليمان عقب العشاء يالله مع السلامه ------ بيت عذرا عذرا: سعد سعد وين وديت المجلات اللي اليوم هنا سعد: هناك بالغرفه عذرا: اللحين انت ليش ماخذهم كلها ملابس يعني انت مره فاهم بالموضه سعد:ههههههههههههههههههههههههه تصدقين انك غبيه ماما معليش اسف عذرا: نعم سعد: ومين قالك اني ماخذهم علشان الملابس عذرا: اجل سعد: علشان اللي لابسين الملابس اه ياماما البنات يجنونوووووووووون عذرا: لا بالله كملت استاذ سعد بعد مستقبل باهر بالصياعه عيب وش هالحكي سعد: الصراحه ماما معليش يعني ترى فيه وحده اعجبتني والصدق ترى شققت صورها وحطيتها بغرفتي عذرا: اييييييييييييييييييييييييييييييييييييييييييييييييي ييييييييييييييييش ومين هذي اللي قطعت المجله علشانها سعد: الصراحه ما ادري قريت بس مافهمت ما ادري اسمها هليتون بس كانت بباريس لانهم كاتبين باريس هيلتون وترجمتها بالعربي يعني اعكس الكلام صارت هيلتون بباريس عذرا:هههههههههههههههههههههههههههههههههههههه الله يخلف علي حبيبي هي البنت اسمها باريس هيلتون يعني اسمها باريس وعيلتها هيلتون سعد:اهااااااااااااااااااا ما دريت بس قطعه عذرا: ايش وش ذا الالفاظ ( قطعه ) خير اسمها حلوه سعد: طيب ان شا الله ----- المستشفى ابو سليمان : السلام عليكم هاه كيفك اليوم دانه: الحمدلله سليمان : - يهمس في - : على صديقات تحفه بس مين غسق ومين وفا دانه: بعدين مب قدام زوجتك جوج : بابا وش تبغى شاهي والا قهوه ابو سليمان: مافيه نسكافيه ؟ جوج: لا بس فيه تحت كوفي انزل اجيبلك ابو سليمان: ياليت لاني تو شميت الريحه واشتهيت جوج: اووكي من عيوني ماما تبين شيء ام سليمان: لا ما ابغى نوره: انا بنزل معك سليمان تبي شيء سليمان: كابتشينو نوره: طيب سليمان: هاه راحت دانه: اول شيء بلا لقافه انت وش دخلك بعدين وين شفتهم قاعد تتجسس ياقليل الادب ولاتنسى تراك متزوج ولعلمك وفا ومتزوجه وغسق حبيبة صديقك يا وقح سليمان: الله الله كل هذا فيني طيب اوريك سليمان: يمه شنطة لوي فيتون اللي مع اللي يوم جت لدانه توقعين بكم ام سليمان: لوي فيتون ايه اللي مع غسق سليمان – التفت على دانه ورفع عاجبه وهمسلها- هههههه عرفتهم غسق ام شنطه لوي فيتون ووفا الثانيه دانه: حسبي الله عليك ام سليمان: هي انت تراني احاكيك سليمان:ايه معليش وش قلتي ام سليمان: اقولك حول ال6 او 7 شيء زي كذا شفتي شنطة وفا حلوه اظنها اظنها قوتشي والا دانه: الا قوتشي ------- الساعات والايام لاتقف فيجب علينا مجاراة الزمن كي لا نقف في وسط الطريق ( الم الغربه في ارجا الوطن للكاتبه بنت الاخضر) |
|
| |
|
08 - 03 - 2008, 05:45 PM
| #103 (permalink) |
| غلاتي ماسي | من بكرا ---- بيت ابراهيم سعد : صدق امي حصه تقول اخت سليمان ولدت ابراهيم: ايه دانه سعد: داااااااااااااااااااااااااااااااااانه هي اللي والدت ابي اروحلها ابراهيم: نعم تمون مررره سعد: مب على كيفك اصلا بوريك وش بسوي اصبر شوي وارجعلك ابراهيم: والله هالولد مهبول الله يخلف على اختي ----- ماجد: ترى حجزت انا بكرا على جده ثلاث ايام ان شا الله عذوب: ان شا الله اجل ابجهز الشنط اليوم ماجد: طيب ------ نوره: سليمان مين تكلم سليمان : سعد نوره: مين سعد سليمان:اليوم تدرين مين سعد ------- عذرا: يمه ليش مانروح نزور نهله ونجود من زمان ما شفتهم الام: لا اخت بتسافر لمكه عذرا: اخس والله ماجد ما يلعب الام: قولي الله يتمم عليه ------ جوج: اهلا دانه: اهلين غريبه جايه بدري جوج: ايه زوجي عنده اوفر تايم وقلت اجي دانه: فتوووووون اهلا ----- سعد : قم البس براهيم: نعم سعد: اقول قم البس بتوديني المستشفى بزور دانه ابراهيم: لا انهبلت سعد: طيب البس ووشوف --- غسق تكلم وفا غسق: اليوم بروح بيت خالتي بنتها والده وفا: مين خالتك غسق: خالتي ام زوجي وفا:ههههههههههه صدقتي عمرك مره طيب عاد اتزيني غسق: اكييد سعد يطق الباب جوج: غريبه مين جاي سليمان: تبعي انا مواعد واحد هنا جوج: ايش سليمان: ماعليك ابعدي تفضل تفضل دانه- شهقت – سعد سعد: دااااااانه مبرووووووك لا تزعلين لا تخافين بكرا ربي يشفيه وعادي يصير قرد دانه: شكرا سعد: ترى كنت جايب ورد بس سليمان رماهم برى سليمان: انا سعد: ايه انت والا بتكذب ما تدري ان اللي يكذب ربي يحطه بالنار جوج: وش السالفه مين هذا سعد – ضبط عمره وراح يسلم – : انا سعد ال.... خالي ابراهيم ال... جوج: اهااااا وانا اخت سليمان سعد: ايه عرفتك تدرين ليش جوج: ليش سعد: لانك حلوه زي دانه وسليمان جوج- استحت – هه شكرا سعد: وهذي مين ؟ سليمان: هذي زوجتي نوره سعد:اهلييييييييين انت نوره ؟ نوره: ايه انا سعد: تصدقين انت مره مسكينه اللي تزوجتي هذا تراه شرير ومزعج وبس يحب ياكل صح وراه مو بس هو حتى اصدقائه ابراهيم وممدوح سليمان: بسم الله عليك انت ماتاكل ابدا سعد: بس شكل زوجتك مؤدبه سليمان: ايه ما شا الله طالعه علي سعد: طيب انا ما اقدر اطول بطلع خالي ابراهيم يستناني تحت يالله باي غسق طلعت برى غسق: الو هلا وفا: وش فيك طفشتي غسق: ايه مره طفش ومليان حريم قلت اطلع اغير جو اصلا الجو مره حلو رومنسي وفا: امووت انا البنت خاقه وحزينه بنفس الوقت غسق:اه بس ليت من يروح هناك وفا: هناك وين انت عنده اصلا غسق: بلا استهبال انا ببيتهم مو عنده لو عنده كنت رميت هالدنيا وما فيها وفا: لا ما استحمل الحب انا بكرا يجي اللي ينسيك ممدوح واللي يعرف ممدوح غسق: لا ان شا الله ما ابغى ابيه هو والا جعلي امووت ما تزوجت وفا: قصري صوتك لا يسمعك احد روحي غسق: ياويلي فيه احد دخل يالله باي ---- ممدوح: زهره زهره ( الخدامه) الخدامه: طيب طيب شكرا مستر ممدوح: مين اللي كانت هنا الخدامه: هذي غسق ممدوح: اها طيب خلاص خوذي هذا الصحن وعطيه مدام وسوي شاهي جيبيه برى الخدامه:طيب ممدوح – هذي غسق من زمان عنها تغيرت مررره لو وحده ثانيه كان تنظرت تشوف مين اللي جاء يا حلوها بعد صدق انها دبشه ليش ما ستنت شوي وانتهى اليوم وتمر الايام وتنتهي وكادت تصبح الايام شمس تشرق وتغيب (الم الغربه في ارجا الوطن) |
|
| |
|
08 - 03 - 2008, 05:46 PM
| #104 (permalink) |
| غلاتي ماسي | بعد مرور شهرين ابو سليمان : سليمان تعال شوي للغرفتي ابيك سليمان: طيب ----- الغرفه ابو سليمان: سكري الباب سليمان: وش عندكم ام سليمان: ابوك يبي يكلمك بموضوع دانه سليمان: وش فيها ابو سليمان: ابراهيم صدق يبيها سليمان: اول ايه بس اللحين ما ادري ابو سليمان: مافي شيء اسمه ما ادري فيه شيء اسمه اذا يبيها يجي يخطبها باقرب وقت سليمان: بس تونا طيب ولدها وشلون ام سليمان: أي ولد الولد بيكون عندي كذا والا كذا هي ماتقدر عليه تعرف اختك حساسه وماتستحمل هي لا شافت بزر يصيح صاحت معه ابو سليمان: المهم انت قله باي طريقه يبيها يجي يخطبها باسرع وقت والا خلاص سليمان: طيب طيب بشوف ----- وفا تكلم دانه وفا: خلاص دانه هذا قدر ومكتوب كلن بهالدنيا ياخذ نصيبه دانه: كلكم حافظين هالكلام وتجون تقولونه لي ترى مليت من هالحكي وفا: ماعندي كلام ثثاني والا كان قلته لك دانه: شكلي بكلم غسق وفا: انت هذا اللي تبينه وحده تزيدك هبل لا تكفين ان كلمتيها تروحين تتنتحرين اللحين دانه: مب لهدرجه وفا: لان حكيها يدخل راسك اذا خسرتوا بهالدنيا شيء مو معناته ان الدنيا كلها سيئه دانه: اتمنى ------- ممدح يكلم ابراهيم ممدوح : ودي اشوف اليوم ضروري ابراهيم: خلاص اوكي عال10 ممدوح: ان شا الله ----- عذرا : فهد متى بنروح لدبي فهد: انا ماقلتلك خلاص حجزت بعد اسبوعين عذرا: كويس مره الوقت مناسب فهد: وش عندك مهتمه عذرا: لان هالوقت بيكون فيه تخفيضات وحلو نستفيد فهد: اهاا ---- وفا تكلم غسق وفا: والله ان قلتيها شيء ياويلك غسق : بالعكس بشجعها على الحياة وفا: اتمنى ذلك غسق: لا مو امنيه حقيقه وفا: وش عندك غسق: ولا شيء بس نوية اقلب الدنيا حقتي بتغير وفا: انت من جدك تقولين هالكلام غسق: ايه والله من جدي وتشوفين بكرا بنروح بيت خالتي وفا: امل ذلك ------ بالليل ممدوح : بصراحه ابراهيم هو الموضوع ما يخصني بس يمكن انا شخص محايد الموضوع يخص اخت سليمان انت تبي تتزوجها او لا ابراهيم: بصراحه انت فاجئتني بس ممدوح: اذا تبيها ترى ابوها مره مستعجل وماعنده استعداد يستنى فاذا تبيها اخطبها ابرهيم: طيب بالاذن انا بطلع ممدوح: فكر قبل لاتسوي أي شيء ابراهيم: ان شا الله خطوات الزمن ليست جليدا سهل الانزلاق بل هي عثرات يرسمها لنا القدر وعلينا تخطيها وان لم نقدر على ذلك فلنقف على حافة الطريق ونترك المرور لغيرنا ( الم الغربه في ارجا الوطن للكاتبه بنت الاخضر) ------ من بكرا سليمان : نوره فهمتي بس جسي نبضها يعني تلميح مو تصريح فاهمه نوره: وش دعوه وش شايفني والله فهمت سليمان: اه متى تخلص هالسالفه والله مليت وزهقت نوره: كنت اول متحمس اكثر سليمان: ما ادري يمكن نوره: انت وش فيك متغير صاير مره مضغوط سليمان: علشان دانه نوره: اتمنى بس يخلص موضوع دانه ترجع طبيعي زي اول ----- سعد : ماما بابا عالتلفون يبي يكلمك عذرا: طيب الو هلا اها طيب طيب اوكي سعد: وش يبي بابا عذرا: الله من اللقافه يقولي وش يبغى غداء سعد: وبس وعععع عذرا: اقول بس حط فاشن روح جيب جوالي يرن سعد: صارووووووووووووووووووووووووخ عذرا: مين سعد: ما ادري ما امداني قطع الخط عذرا: ابراهيم غريبه الو هلا ايه ايه اكيد حيا ك الله سعد: وش يبي ؟ عذرا: بيجي المغرب لنا سعد: اها ليه عذرا: وش دراني بطل لقافه ----- عذوب : الله ليت من يروح لمكه مره ثانيه الام: ايه والله بيت الله ما احد يعافه عذوب: ايه صادقه بس على الله الظروف ماهي باليد دايم الام: الجايات اكثر ايه صح ترى ودنا لنا يوم نروح نزور نهله ونجود عذوب: ايه ان شا الله ------ المغرب عذرا: هلا والله تفضل ابراهيم: هلا شخباركم عذرا: الحمدلله ابراهيم: فهد موجود عذرا: ايه بس فوق طلع يريح شوي وقالي لا جيت اناديه سعد رح لبابا خله ينزل سعد: طيب فهد: هلا ابراهيم ابراهيم: سعد معليش ابغى امك وابوك بلحالهم سعد: ياربي اففففففففففف منكم ترى انا مو بزر ابراهيم: ادري بس لو سمحت بقولك كل شيء بعدين سعد: اففففف طيب عذرا: وش فيك ابراهيم: انتم اللي ممكن تساعدوني بصراحه انا .................. وقالهم كل السالفه عن دانه عذرا : ابراهيم الوضع مره صعب يعني انت فاهم البنت مره غير فهد: بس هم مو ناس منزلين من السماء عادي صح ناس مستوى بس على كلامه ان الاب بدى يقتنع فيه عذرا: بس ولو كل اللي سواه قبل ما ينسى فهد: من حق الاب يخاف على بنته بعدين الولد يبها وهي تبيه ليش نعقد الموضوع عذرا: انا ما اعقد الموضوع بس الوضع مره صعب والبنت كانت ماخذه ولد وزير وجايبه منه ولد والولد بعد مريض يعني المسؤوليه مره كبيره ابراهيم: انا معك بس هذي فرصتي من يحصله بنت زي كذا فهد: سؤال انت تبيها لانها فرصه والا لان البنت عاجبتك ابراهيم: لا طبعا البنت عاجبتني فهد: انا اقولك توكل على الله عذرا: سالت اهلي ابراهيم: لا انت اول وحده انت اللي طالعه على مجتمع امي مالها الا اللي حولينها و فهد: عذرا انت مكبره الموضوع طالما اهلها رضخوا ورضوا خلاص أي ان كانت اسبابهم هم احرار عذرا: انا ماني معترضه لكن ماني مقتنعه بس توكل على الله براحتك ابراهيم: طيب انا لازم احاكي ابوي وامي باسرع وقت بس ابغاك تكونين موجوده عذرا: خلاص اوكي بكرا ------- يوم جديد ونسايم الامل بدات تهب غسق تكلم وفا وفا: الو هلا غسق: اهلين وفا: اسفه كنت نايمه لما اتصلتي غسق: توقعت لان الوقت كان متاخر اصلا ما رجعنا لبيتنا الا لما اتصلت عليك وفا: طيب وش فيك اول ما شفت المسج دقيت عليك وش السالفه غسق: شفته شفته شفته وشافيني وفا: مـــــــــــــــــــــــــــــــــــــــــــــــيـ ــــــــــــــن ؟ ممدوح غسق: اه ايه ممدوح وفا: يا تبن وللحين ساكته تكلمي غسق: اتكلم وش اقولك وش اقول وفا: قولي بس وشلون شفتوا بعض غسق: طيب اسمعي خليني اقولك ليش حنا كنا بالهواء الطلق وفا: مو مهم السبب المهم وشلووووووون غسق: اقولك مر مرتين قدامي اوكي وفا: اها غسق: بس هذي ما اظنها مقصوده بس الحركه اللي متاكده انها مقصوده لما مر من وراي وانا فعلا ما انتبهت وفا: كيف مافهمت غسق: اقولك كنت واقفه انا وبنات خالاتي المهم انه مر من وراي شيء حسيت بهواء وراي التفت لقيته هو توه مر وكان فيه مليييووون طريق يقدر يمر منه وش معنى مر من وراي وفا: لحظه اللحين انت كنت واقفه وهو جاء مر من وراك غسق: ايه علما بان فيه اماكن كثيره يقدر يمر من عندها ليش يمر من وراي وفا: وانت مبسوطه والا مقهوره غسق: لا طبعا مبسوطه بس كان ودي اقوله ممدوح احبك وفا: اان شا الله تقولينها لا صرتي زوجته غسق:اه ياحلوها هالكلمه زوجته وفا: الله يرزقك غسق: ماتتخيلين وشلون امس حالتي غير غير بس كل الفرح راح لما طلعت دايم كذا لاطلعت اصيح انقهر من وضعي السخيف وفا: مو سخيف غسق: اتمنى ---- بيت ابراهيم الاب: انت فاجئتنا بهالموضوع بعدين وشلون تبيني اروح اخطب وش اقول لاهل البنت ابراهيم: اهل البنت يدرون عن كل شيء الام: وراضين ابراهيم: ايه راضين عذرا: يبه لا تعقد الموضوع خلاص الموضوع مايبي الا انك تروح معه تخطب رسمي بس الاب: بس انا ماني مقتنع اني اناسب ناس زي كذا الام: وش فيهم ناس زي كذا حاصلك تاخذ بنتهم الاب: بس عذرا: يبه لو سمحت خلاص ابراهيم: عذوب وش رايك ليش ساكته عذوب: انا عادي بالعكس ودي هم ناس كويسين الام: توكلوا على الله عذرا: يالله يبه الاب: طيب مب مشكله كلمي الام وعقب نروح نخطب رسمي ابراهيم: الله يطول عمرك ----- نوره: دانه مره يائسه من الحياة احس لو ابراهيم يخطبها يدخل على حياتها نوع من التجديد سليمان: الله يسر امرها ابراهيم يكلم ممدوح ابراهيم: هلا والله ابغى رقم بيت سليمان ورقم ابوه لو سمحت ممدوح: والله قدع ما يجيبها الا رجالها خلاص ان شا الله شوي وارسلك الارقام بمسج ابراهيم: تكفى لا تتاخر ممدوح: من عيوني ايام تبعث السعاده للروح تنثر العبير الفواح زجاج اليائس سترمى في البحر وستكسر زجاجة الفرح عما قريب السعاده ملك للجميع وليست سلعه تباع او تشترى هي نسمة نبحث عنها ( الم الغربه في ارجا الوطن) |
|
| |
|
08 - 03 - 2008, 05:48 PM
| #105 (permalink) |
| غلاتي ماسي | بعد مرور شهر بيت ابو سليمان دانه: الله يبارك فيك عقبالك غسق: الله يسلمك دانه مسك يدها : لا تيئسين غسق وتبلع عبرتها : ان شا الله دانه: ما ابغى اشوف احد متضايق بهاليوم تكفين غسق: ولا يهمك وفا: مبرووووووك معليش تاخرت سامحوني دانه: المفروض اني ما اسامحك بيوم زواجي تتاخرين وفا: وش اسوي شعري ما ضبط ورجعت سويته لي الكوافيره دانه: طيب طيب صرفي قولي كنت قاعده بحضن الفارس الملثم وفا: خيييييييير غسق: هههه حرام عليك فشلت البنت دانه: هههههههه من جد يالله بس روحوا ارتزوا جوج: نوره نوره نوره: هلا جوج: شكلي حلو نوره: طبعا دايم انت حلوه جوج: الله يسلمك نوره: يالله ترى اهل العريس جوا ام سليمان : هلا والله تفضلوا ام خالد: هلا بك الله يسلمك ام سليمان: هذي جوج هه اقصد جوزاء بنتي الكبيره وهذي نوره زوجة سليمان ولدي ام خالد: هلا والله جوج: تفضلوا تفضلوا حياكم الله ----- المجلس ام خالد : كيف حالكم وش اخباركم ام سليمان : الحمدلله بخير الله يسلمك ام خالد : ماعرفتينا عالباقين ام سليمان : هذولي صديقات دانه وفا ال... متزوجه محمد ال.... و هذي غسق ... ام خالد: ماشا الله ام سليمان : وهذي اختي ....... وهذي ......................الخ ام خالد : يا هلا ام خالد: عاد انا مثلك ماعندي الا هالبنتين عذرا وعذوب ام سليمان: عذرا هي ام سعد عذرا: ايه انا ام سعد واصلتكم اخباره ام سليمان: سعد ما شا الله اشهر من نار على علم عذرا: ياويلي هالولد فشلنا نوره: بالعكس مره يجنن الخدامه: ماما بليز كوم اب ام سليمان: طيب اوكي فوق ام سليمان: وش فيك الخدامه: بيبي يصيح وما اعرف وش اسوي يا مدام ام سليمان : ياعمري نسينا الولد اليوم اسمعي شربيه حليب اوكي واذا قعد يصيح ناديني اوكي الخدامه: طيب مدام ------- مجلس الرجال سعد : وش اخبارك ابو سليمان ابو سليمان : الحمدلله بخير الله يسلمك سعد: شفت هذاك تراه ابوي ابو سليمان:تشرفنا سعد: عن اذنك بروح اتعرف عالباقين ابو سليمان: خذ راحتك سعد: اهلين انا سعد.....................الخ وطبعا سعد وهباله ما ينتهي ممدوح: اشوف الضحكه شاقه الوجهه ارحم حالك ابراهيم: صدق الرازق في السماء والحاسد في الارض حاسدني لاني فرحان ممدوح: لا مانيب حاسدك الله يوفقك سليمان : وش عندكم تقرقون ابراهيم: حاسدني سليمان همس لممدوح: وشولوه تحسدوه جوى لك حبايب ممدوح: وشو سليمان: انت ماعندك بنت خاله اسمها اسمها اصبر عليها اسم غريب غسق ممدوح – انثدم- : وانت وش دراك سليمان: تصير صديقة دانه اختي ممدوح: وساكت ماتكلمت طيب وشلون عرفت انها بنت خالتي سليمان: مب وقته اللحين ممدوح: وقته والا مب وقته بتقولي سليمان: ابدا كنت مره اسمع دانه تكلم صديقتها وشفتها مره متفاعله معها ولقافه جرجرت دانه الين قالتلي السالفه وعرفت بالاخير ان ممدوح هو حضرتك ممدوح: الله يالدنيا اللحين الناس تدري انها تحبني وانا ما ادري سليمان: شفت الدنيا تصرف اذا تبي البنت طالما انها بين يدينك لا بكرا تفلت ------ الساعه 3 بالليل جوال سليمان يرن سليمان: ممدوح غريبه الو اهلا ايه انا سليمان ايه اعرفه وشوووووووو طيب طيب أي مستشفى جوج: وش فيك سليمان: ممدوح بالمستشفى وفا: الله يوفقها يارب غسق: امين من جد تستاهل وفا: وش فيك متضايقه اليوم ماكنت على بعضك غسق: لا ولاشيء بس امس محلمه حلم مره شين وفا: خير ان شا الله غسق: عادي اقوله احس ان بيجيني شيء لو ما قالته تخيلي محلمه ان ممدوح خطب وفا: حطي ببالك ان ممكن يصير هالشيء غسق: وفا انا لازم اسكر وفا: غسق عسق تصيحين غسق: مقهوووووووره مب انا اللي احب وغيره تجي تاخذه كذا مب حق هذا اول انسان من جد اتمنى اتزوجه بدون ما اقول قبلها يتغير فيه هالشيء وعقبها اتزوجه انا ابغاه باللي فيه وفا: كلنا تمنينا بس مو كلن صارله اللي يبيه ربي له حكمه غسق: الحمدلله بس دايم الحظ يلعب على كيفه اللي له حظ يصيرله اللي يبيه وفا: بس غسق: بس دايم كل شيء عكس ما ابي اشق هدومي اذبح نفسي علشان ارتاح انا ياناس مااااااااااااااااااابي اتزوج انا اتمنى انسان واحد ما قعدت اطلب زي البنات فلوس وعيله واسم وصيت ومنصب ومركز اجتماعي وووالخ انا انسان حبيته بس ماينلام انا الغبيه انا اللي ماقلتله شيء استاهل بس وش ذبني اذا عاطي الواقع وجهه وخفت على اهلي واهلي انا ما فكرت بانانيه وقلت طز باهلي او اهله بعد ما اقدر ادوس كرامتي بالارض بس علشان الحب وفا: بالحب مافي عزة نفس ------- ام سليمان: هاه وش جاه سليمان: تعبان مرره متاثر من الحادث بقوه الله يستر جوج: ياحياتي ياويلي اهله لو دروا قالولهم سليمان: ايه كلمت اخوه وماتركت المستشفى الا لما جوا نوره: الله يقومه بالسلامه ابو سليمان : سليمان قل لابراهيم عن اللي صار لازم يروح للمستشفى سليمان: ان شا الله يمه اذا كلمتك او انت ياجوج والا نوره علموها --- من بكرا الظهر خالد: والله ما شا الله عليهم مبين ناس كاااااااااااااش الام: وانت هذا اللي هامك قل الله يوفقهم ويتمم عليهم خالد: امين الاب: بس ما احتكوا فينا مرره عذوب: يمكن الرجال كذا بس ماجد يقول خوالها مره حبوبين خالد: ايه صح اكثر من عمانهم مو مره اجتماعين عذرا: بس ناس بصراحه يشرفون مره يجنون الام: ايه شفتوا فلانه ............الخ الاب : عاد بدت سوالف الحريم اقول ياولدي هالسوالف ماتجوزلي وماتعجبني ابدا مع السلامه خالد: خذني معك وش يجلسني انا بعد ------ دانه : الو هلا ماما كيفك ام سليمان: الحمدلله انت كيفك وابراهيم وش اخباركم عساكم بخير دانه: الحمدلله ام سليمان: عسى كل شيء بخير وماشي تمام دانه:ههههه الحمدلله ماما ابراهيم مره طيب ام سليمان: الحمدلله دانه: ماما دودي وش اخباره ام سليمان: لاتخافين عليه دام ان ولدك عندي لا تشيلين همه وكل شيء زي اول لا بغوا يشوفون الولد ارسلناه لهم ولا اعترضوا على الموضوع حتى بعد زواجك والممرضه عنده وكل اسبوع نوديه للمستشفى لا تشيلين هم ام سليمان: ابراهيم عندك دانه: لا بالحمام ام سليمان: طيب ودي اكلمه دانه: اوكي هذاه طلع ابراهيم ماما تبيك ابراهيم: هلا عمتي الحمدلله ابشري بعيوني والله بخاف عليها اكثر من نفسي سمي وش فيه ممدوح ايييييييييييش متى طيب طيب اللحين بكلم سليمان دانه: وش فيك ابراهيم: ممدوح صارله حادث امس دانه: لا عاد ------- غسق: لااااااااااااااااااااااا بموت بموت خلاص مب حال وفا: استغفري ربك وش هالحكي هذا قدر واذا ربي كاتبله حياة بيعيش واذا ماكتبله بتكون ايامه الاخيره غسق: لااااااااااا لاااااااااا لا يموت لا يموت انا مو ناقصه اللي فيني مكفيني كلن مسموح يروحله المستشفى الا انا وضعي صعب حتى بالمرض وضعي مختلف انا مليت من هالوضع وفا: قولي لا اله الا الله بنلقى حل ان شا الله روحي زوريه انت بنت خالته عادي غسق: عادي على الناس كلها مو علي انا انا وضعي مختلف كل الدنيا بتنظرلي نظرة سخيفه وفا: ادري بنلقى حل بنلقى غسق شوي واكلمك وفا: هلا دانه دانه: اهلين دريتي وش صار لممدوح وفا: ايه غسق توها قايلتلي دانه: وكيف نفسيتها وفا: هي بلا شيء نفسيتها بالارض مب عاد بعد اللي صار دانه: تبي تروحله للمستشفى وفا: ايه بس ما تقدر دانه : الله يلعن القرايب صدق الاقارب عقارب وفا: محد من الهم خالي ------ غسق ( صبرت بما فيه الكفايه اليوم ما يلح بكرا بكرا بكرا واللي يصير يصير ) ابراهيم : اه ممدوح شكله تعبان بس الدكتور يقول ان شا الله بيصير احسن دانه: ان شا الله عاد بنقعد طول الوقت بحزن ابراهيم: احد يحزن وقدامه دانه دانه : احبك ابراهيم: احبك طيحتيني بحبك بثواني دانه: قلت بالاخير لي لو انت محترم نفسك من الاول وقايلي احبك بس انت كنت مسويلي فيها ثقل وكبير ابراهيم: اوه يعني المساله انتقام دانه: ههههههه شيء زي كذا ابراهيم : اجل انتقمي على كيفك احبك احبك احبك |
|
| |
|
08 - 03 - 2008, 05:50 PM
| #106 (permalink) |
| غلاتي ماسي | ------ من بكرا وفا ( يارب استر وينها ذي ما ترد يمكن نايمه ان شا الله تكون نايمه ) عذرا : يمه كلكتي ابراهيم الام: ايه كلمته يا حبيله شكله مبسوط عذوب: الله يديمها عليهم غسق : وفاااااااااا وفا: وش فيك غسق: رحت لممدوح وفا: اييييييييش شلون وكيف ومع مين غسق: بلحالي ودخلت الغرفه بعد الرشاوي اللي عطيتها بس بالاخير دخلت بس متحسن كثير عن اول وفا: الحمدلله طيب قام والا غسق: لا لما كنت عنده كان نا يم بس مو فاقد الوعي لا طبيعي وفا : وبعدين شفتيه وش سويتي غسق: مسكت يده وقربتله وقلتله ممدوح انا اسفه تكفى سامحني ممدوح ممدوح والله احبك وفا: طيب افرضي ما استوعب انك جيتي غسق: تركتله كرت مع ممرضه وعطيتها فلوس وقلتلها لما يقوم عطيه الكرت واذا عطيتيه احد ثاني والله لافصلك وفا: يا خبله مانتي ضامنتها غسق: عاد ما ادري وش يصير بالطقاق وفا: شكلك انهبلتي غسق: احسن ولا اعيش عاقله بزمن مجانين بعد مرور ثلاث اسابيع دانه : ماما اشتقتلكم ام سليمان: يا بعد الدنيا والله حتى حنا اشتقنالك دانه: يبه شكرا ابو سليمان : العفو يابنتي انا ما سويت شيء غير الواجب سليمان: عبرينا الووووووو دانه: هلا والله كيفك هلا نوره نوره: الحمدلله على سلامتكم دانه: فتووووووووووووووووووووووووون اهلا حبيبتي هلا جوج سليمان: ابراهيم برى دانه: لا راح يزور اهله وبعدبن بيرجع ----- وفا: اليوم دانه بتجي غسق: ايه وفا: الوووو وش ايه انت معي غسق: لحظه بس تلفون البيت يرن وفا: طيب ردي غسق: قطع اذا رن برد ولو اني مالي خلق اكلم احد يمكن وفا: لا عيب ردي غسق: لحظه لحظه يالله باي برد غسق: الو ممدوح: الو غسق وين صالح موجود غسق: ايه موجود مين اقوله ممدوح: ممدوح غسق: طيب لحظه شوي --- غسق تكلم وفا وفا: هلا غسق: هلا وفا: وش فيك ههههه من اللي اتصل غسق: ممدوح وفا: صدق طيب ليش زعلانه المفروض تنبسطين غسق: على بالي متصل علشان غسق وين صالح وفا: يمكن يالخبله متصل علشانك بس كذا تصريفه غسق: ايه طيب -------- بعد مرور ثلاث شهور دانه : ماني مصدقه ابراهيم من جدك انت ابراهيم: ايه من جدي انا ما اقدر اجيب عيال بسبب ظروف مريت فيها لكن اقدر اربي ولدك واهل زوجك مو رافضين بس يبون الوضع يمشي زي ماكان انهم متى ما بغوا شافوا الولد دانه: بس ترى مره مسؤوليه انت عارف هالوضع ابراهيم: عارف ومافي شيء بيتغير الممرضه بتظل معه وانا بصير ابوه الثاني وبيتنا قريب من اهلك يعني محلوله خلاص عاد قولي ايه دانه: خلاص اوكي وانا ما عندي أي مانع ----- سعد: ماما وش رايك ودي اخطب فتون بنت اخت دانه عذرا: لا والله زين ما اخترت اصبر بس علشان نجهز البيت ونفرشه سعد: يعني انت موافقه عذرا: سعد ووجع كلك على بعضك نتفه بعد بتتزوج وتخطب انقلع بس سعد: ماما انت بتسوين زي ابو سليمان يوقف بوجهه الحب لاتصيرين شريره عذرا: لا ان شا الله ما اصير شريره لا تخاف ----- وفا : هي من جدك وش ذا المسج اللي مرسلتها لي غسق: ههههههههههههههههه وشو وش فيها المسج وفا: ما فهمت شيء قايلتلك بصير ربي قادر على كل شيء وش ذا الخرابيط غسق: ممدوح وفا: وش فيه غسق: خطبني وفا: غسق انت تكذبين اعرف صدقك من كذبك غسق: ايه اكذب والله العظيم خطبني والله وفا: وشلون طيب ليه صوتك كذا غسق: خفت حسيت بالمسؤوليه حسيت اني توني ببدا بالمواجهه ردة الفعل اللي ببيتنا ماكنت متوقعتها حتى خالتي ماحسيتها وحده فرحانه انها بتخطب لولدها وفا انا احس ان كل شيء فيني بدا ينطفي انا ليش حبيه ليش حطيت اهلي بموقف زي كذا ليش وفا: انت تبينه وهو يبيك وانتهى الموضوع خلاص وجاء وخطبك أي ان كانت ردة الفعل لاهلك او اهله مو مهم خلاص الوقت راح على هالكلام وانت مو مسؤوله عن علاقاتهم العائليه فاهمه غسق: اقولك شيء بصراحه خايفه نفشل وقتها مالي وجهه اناظر احد وفا: لو لا قدر الله وفشلتوا فهذا قدر ومكتوم واحنا ما كتبنا اقدارنا بيدنا والا كان ابدعنا بحياتنا كان انا اخذت الانسان اللي اطمح اني اخذاه هذاك المركز الفلوس الرومنسي الوسيم اللي يحبني كان انت خطيبة ممدوح من لما كنتوا صغار ويدري انك تحبينه وما يتلوث هالحب بتجربه سخيفه لك او اهانه له وخالتك تدلعك وتحبك ويوم المنى اللي تشوفك زوجة ولدها مو على قولة كنها جايه تعزي وهي تخطب وكان دانه حبها ابراهيم من زمان وكان وكان وكان لو بقولك كم بنت حبت ما راح القى عدد غسق: لاحظي مع اختلاف النهايات اللي صارت وبتصير اه اه اول مره احس بصعوبة قرار اتخذه بحياتي انا واثقه اني ابيه بس خايفه من بكرا وفا: لا تخافين انت هذي مشكلتك بكرا خلي بكرا يجي فكري باليوم وخلي الباقي على ربك غسق: ههههه بس ياحبيله واخيرا سواها وخطبني لحظه معي مكالمه غسق: الو ممدوح: الو هلا غسق غسق: مين ممدوح:ههه ممدوح ادري انك مستغربه اتصالي بس ابغى اقولك شيء وبسكر غسق: تفضل ممدوح: عنسنا صح بس بالاخير سوينا شيء انت حره تتخذين أي قرار تبينه بس ودي بكلمه اقولها لك غسق انت غبيه اذا للحين ماتعرفين انا قد ايش احبك غسق: ههه وانت دلخ اذا ماتعرف انك اعز واغلى انسان بحياتي لك معزه بقلبي ما يعلمها الا ربي ممدوح: هين الوعد بعد شهرين ليلة الزواج اجل انا دلخ غسق: مو انا غبيه ممدوح:هههههههههه غسق : الو وفا: وش فيك وش فيه صوتك غسق: ياويل قلبي ممدوح اتصل تو علي وقالي ............................ وفا:ههههههههههههههههههههه يلعن ام الاسلوب اللي عليكم الدليل ان كل واحد فيكم ادبش من الثاني ---دانه : لا عاد ممدوح بتزوج ومين اللي بياخذها ابراهيم:هووو وش فيك كذا معصبه طيب دانه: اول قولي مين اللي بياخذها ابراهيم: بنت خالته دانه: أي وحده ابراهيم: وانا وش دراني دانه: بس سؤال اللي يحبها والا لا ابراهيم: الا اللي يحبها دانه: اشوووووووه ريحتني احسبه عقب ذا الصبر ما نالوا شيء الحمدلله ------ عذوب : ماجد ماجد فهده وين بابا فهده: بابا راح يصلي عذوب: الحمدلله ---- جوج: يووووه قرار مره صعب والله طلع انسان عاقل ابراهيم هذا ام سليمان: شفتي شلون الا صدق انت حامل جوج: هههههههههههه ايه ماما انا حامل ام سليمان: والله ما صدقت يوم سمعت فتون احسبها تكذب ------ ام خالد: شكل ابوك متزوج مسيار مثلك خالد:ههههههههههه يمه انت ماملتي من هالموال اقولك سر ام خالد: قول خالد: ترى ابوي متزوج مسيار بس مو بالرياض زي لا ابوي بالشرقيه ام خالد: ايه قلتلي والله اني حاسه من زمان وانا اقولكم ---- ابو سليمان : ياحبيلوه ممدوح اتصل تو يعزمني على زواجه ومستحي مرره سليمان: ههههه هو مره مستحي مره متغيره شخصيته بس اخيرا بيتزوج مابغى كنت احسبه بيقعد طول عمره ما يتزوج ابو سليمان: الله لهدرجه هو كاره العرس سليمان: لا مو كارهه بس ماتصدق امه وشلون كانت رافضه الموضوع ابو سليمان: اول مره اشوف ام ماتبي ولدها يتزوج سليمان : لا هي ماتبي البنت مو الزواج ابو سليمان: احل ومن جايب البنت اقصد من وين عرفها سليمان: بنت خالته ابو سليمان: ههههه صدق العرق يحن هذي مثل امك قرايب وخرووووووا عنهم سليمان:ههههه وكل الثنتين بالاخير رضخوا النصيب والقدر فوق كل شيء ابو سليمان: انا عن نفسي اذا البنت مافيها عيب او شيء سيء عادي جدا بالنسبه لي سليمان: انا نفس الفكره المفروض التفكير يتوجهه نحو الشخص مو يقرب والا ما يقرب ----- غسق تكلم ممدوح ممدوح: صوتك مو عاجبني اليوم ابدا غسق: تصدق خايفه تدرين اننا بكرا بنكون بلحالنا ممدوح:هههههه ومن ايش خايف انا ما اخوف غسق: ادري بس ممدوح ممدوح: هلا غسق: احبك ممدوح: مو لو مخلين الزواج اللحين احسن غسق:ههههه لا كل شيء بوقته حلو بكرا يعني بكرا ممدوح: اففف عاد الرجال اقعد مرتز وسلم ولا تسولف ولاتقوم ملل غسق: هذا حال الدنيا ---- الحياة ليست مصاغه بالقلم والمسطره وليست قوانين مقدسه الحياة طموحات واحلام وعثرات ويائس وفشل حين لا تتحقق الاماني ليس يعني ان نموت وما بعد الصبر الا فرج ومن رفع دعائه لله يثق بان الله سيحقق له احلامه صباح يشرق من جديد حب يلتقي او لا يلتقي ليست نهايه العالم فشلت في الحب هناك حب وحب وحب حب الحياة الاخر تكمن النهاية علينا انودع الدنيا شئنا ام ابينا فودعوها من قبل ناس عزوا على قلوبنا بشر ذرفنا الدمع لاجلهم كل يوم ولكن هذه هي الدنيا الى كل من تعرض لظلم في سجن او من شخص او او او فالحياة تخبئ الاجمل الى كل من عشقت عشق صادق وفشلت ليست هنا النهايه الى من عشقت ونجحت حققتي اجمل امنياتك الى كل من فقدت ام او اب او طفل او زوج او زوجه او او او كلنا فقدنا كلنا بكينا وكلنا نعيش تحت ظل غيمة الحزن واليائس ولكن ام ان للشمس ان تشرق وتطل علينا بيوم جديد الينا يامن تغربنا في اوطاننا يامن بكينا وصراخنا الم يحين وقت العوده للوطن نعم حياة تجلب اليائس والفشل نعم حياة تحطم الذات ولكن هناك بصيص للامل يطرق الباب وليلقي التحيه ويغادر لا نائيس ولا نفشل فلنقولها لعزيز ذاتنا لا لاننا نقتنع بها حكمنا بالحياة كثيره ولكن لا تتطبق بزمن الغربة هذا الم يحن لسطوري ان تنتهي كلماتها وكيف تنتهي وحياتي لم تنتهي بعد ( الم الغربه في ارجاء الوطن للكاتبه بنت الاخضر) |
|
| |
|
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| انت بقلبي الوطن | حلاوة لبان | همس الوجدان وفيض القلم | 5 | 14 - 02 - 2007 12:46 AM |
| حب الوطن بين الحقيقة والادعاء | شريان الخير | أرشيف | 3 | 16 - 01 - 2007 08:10 AM |
| حب الوطن بين الحقيقة والادعاء | شريان الخير | أرشيف | 1 | 11 - 01 - 2007 03:33 AM |
| عودة الصويلح لارض الوطن . | تكفيني الذكــرى | صدى الملاعب | 6 | 18 - 08 - 2006 04:27 PM |
العرض العادي
