[align=center] بسم الله الرحمن الرحيم السلام علاكم اسفه عالتأخير لحقت على اخر يوم بس وش اسوي زحمة ذا الامتحانات ما خلتنا نفضى نحك دميجاتنا <<< اخلصي عاد كان يا مكان في تالي العصر والاوان كانت فيه بنت اسمها ليلى تعيش بالغابه << يؤ لا هذي وحده ثانيه هونت وحده اخرى كان يا مكان في سالف العصر والاوان كنت انا محاكيتكم ومحدثتكم جالسه بالسطح اتنشق الهواء العليل يالله من فضلك يعني الصراحه امي مرسلتني اجمع الحمام الي بالسطح عشان تطبخهم للعشا مع كاس خبز وكيس جبن كرافت <<< اعتبروها دعايه عاتي يستاهل كرافت موب دينامركي وبينما انا بعز انشغالي بتأمل المناظر الاخاذه <<< كييييف ما يمديني على اخاذه توني شاريتها الا وذاك الهندي الي يطير بالجو عاد انا ما استغربت من هالشي لا عادي تصير دايما بالعاده اشوفهم انا ..العمال الي يجون عند اهلي ذولا الله يسلمكم لازم ياخذون جوله بالجو بعد ما ينتهون من الشغل بسخانه خربانه عندنا كعربون شكر وتشويت وبعدها جولتن اخرى بونيت اخوي الفاخر على النفود عاد هذا موب عربون شي بس تعليم السواقه لاخوي المهم انا الي تفاجئت منه و صعقني انه موب أي هندي لا هذا اميتاب باتشاتشان بخشمه وشحمه ...! اميتاب ابو قذله ما غيره>>>>يا عليه قذله بعد .... جدتي دايم ودها تسرقها لولدها حميدان الاقرع الدجال <<< اسمه بالحاره تعريف بسيط لاميتاب: ممثل هندي مشهور بوسامته منذو ما يقارب 100 عام وهو موجود المهم اني رحت بسرررعه اجيب نوتة التوقيعات الي تحت مخدتي هذي النوته اجمع بها توقيعات الاشخاص المشاهير الي اشوفهم او يشوفهم احد من اخواني وياخذ توقيعهم لي >>> اشوى ان نصهم تزوير توقيعات يجيبون اخوياهم يوقعون ويلعبون علي يا حافظ المهم ان عندي تفتر توقيعات لناس هذا اهم شي ان شاء الله مشتهرين ببلوتوث عاتي اهم شي طالعين بالشاشه والكل يعرفهم يعني من الي فيها : حسينان بن فتحي ابو خشه <<< عارض ازياء مشهوور بالحاره يكشخ بالتكميله ويطلع يوقف عند الباب لزوم العرض ويقولون ان المحل الي يعرض لهم ملابسهم معطينه اجازه طول الحياة بس يفكهم ويروح الشخص الثاني : كاميرون بنت دياز الرياض هذي وحدتن مشهوره مررره عاد يالله جبت توقيعها وقصتها ان اهلها ما عندهم الا هي ومن الدلع شبههوها بكاميرون دياز الممثله بس تبون الصراحه انا ما اشوف الا انها تشبه اوبرا لا وبدون تغليفه بعد يعني بدون مكاييج وكم شخص عايشين بنفس الحاره ومنهم ابوي يوم طلع بالتلفزيون بعد حادثة 11|9 كان من المتهمين يالله من فضلك بس :eek: المهم اني نويت اخذ توقيع اميتاب عاد ذا عالمي موب أي كلام <<< الله يخلف على امن جابتتس بس وقعدت احتريه تحت بالحوش لين ينزل من الجوله المجانيه واثناء احترائي له احترائي = انتظاري على وزن احتريته = انتظرته * ولا المزيون حسينان طالع من بيتهم وانا الي اعدل كشيشتي و اعدل هندامي (هندامي من نفس المحل الي شريت منه كلمة اخاذه) المؤثرات الصوتيه حاليا: يوم اقبل عليا خصني بالتحيه وابتسامة سلام جيت ارد التحيه ... الى اخر الاغنيه ولا ذاك الي يقطع جونا وهو طايح على رقبة حسينان ابو خشه قال اوه ام سوري ام سوري ميدم ( ميدم بقلقلة الدال= مدام = سيدتي ) بلهجة الهنود قال ابو خشة : ميدم والله من يقرّع ذا القذله يا منعون الوالدين وش شمبوك ياخي( الترجمه للمذكور هنا: ماذا تستعمل من سائل تغسيل الشعر يا اخا العرب ولا اميتاب قام يطامرفجأه وهو يقول ذيك الاغنيه دالي دالي دون دالي >>>>>>>الي بها بنات ما يستحون المهم ما علينا بحكم لغتي الهنديه المتمكنه قعدت اتفاهم مع اميتاب قلت له ياخي انت وش جابك هنا؟ قال انا جاي امثل فيلم بس يوم جينا نستأجر بيتكم التراثي كإستديو تصوير نادر اهلك حسبوني من ذا السمرمد الي يصلحون السخان عندكم قلت انا : اركد بس ذولا يشتغلون شغلة شريفه مو مثلك اهم شي انهم يحصلون على الجوله الجويه بس قال : قال الله من قله بس قالت ايش قالت جوله جويه روحي بس روحي ذا السما الي عندكم ولا المناظر الاخاذه ؟ انا ما شدني بجملته الجارحه كلها الا اخر كلمه وعشان كذا استعرتها منه وحطيتها ببداية القصة <<< ام الدلاخه كلها قلت: يالله بس لا يكثر انا جايبتن تفتر التوقيعات بتوقع ولا ضف وجهك ؟ <<< ابو الاسلوب الي تعرفينه قال: لا اوقع اوقع وش ورانا الا توقيعات ذا الموعقبين < << يحتك باخوانا المصاريه عاد رحت انا اعطر الصفحه بعطر زيت الزيتون موب الي موقعها هندي؟؟ المهم قلت ابوي عازمك ببيتنا يبي يغديك على قوطي بهار تعبيرا عن اسَفه عن حركات اخواني يوم شوتوك بالسما بس هم ما يفرقون كلكم هنود ريحتكم زيت سواء كنت ممثل او كهربائي يعني.... وانا اقوول كل ذا الكلام ما كان قدامي احد لانه بكل سرعته انطلق ناحية بيتنا حسبي الله على ذا الهنود يشمون ريحة بهار بس يدوخون لحقته قلت نشوف اخرتها معه يوم دخلت البيت ولا ذا الي فالها واله مع الاهل قاعدين يعرضون العرضه الهنديه <<< الرقصه المشهوره بكل فيلم هندي بيني وبينكم انا خفت عالاهل قلت عسى ما حط لهم شي ما شيات بس اهلي دومهم كذا فالينها مع الضيوف الله يحفظهم بس يعني مثل ما انتم عارفين ان عادات الشعوب تختلف في كل شي حتى بالترحيب بالضيف واهلي مكس شعوب يعني من كل دولة وجه يفتح النفس بس طلعت انا من بينهم لله الحمد مي الجنسيه السعوديه وانا الي اطفي المسجل الخيالي الي دايم بالافلام =المؤثرات الصوتيه قلت ما شاء الله عيني عليكم بارده عالريحه رقص على طول ما فيه تفاهم عندكم انتم يعنيانا اخبر ان الواحد الاصيل ما يقوم يرقص الا واحدن ملزّم عليه حسبي الله على عدوينكم وانتم من دخل عليكم ابو قذيله ذا الا وانتم بديتوا السلام الوطني بس يالله دنيا يوم لك ويوم عليك الي باقدر يطلعوه الملاس من جد وجد<<< مركبه برنامج امثال بمخها واشتغل ما يطفى الا اذا خلص البطاريه قال اميتاب:وسعي صديرتس ياخيتي <<< ضابط اللهجه يقطع شكله قلت اخلص علينا انت.... توقيعك واخذنا وش تستنى؟ قال ابد بس الوالد عطاني البيت وقال وان بغيت بنيتي الزين نجدي تمثل معكم بعد عاتي :eek: اثر الوالد من جد فلها يا حليله متمدن<<< ااااابو ااابو المدن الي تعرفونه ولعت براسي نمبه<<لمبه وانا الي قلت محد موقفهم عند حدهم ذولا الا 911 وامسك التيليفون ردت علي ( ) :YES CAN I HELP YOU? انا: هلا والله كلنا الحمدلله ابشرتس انتي تسيف حالتس عساتس بخير؟ ( ) : SPEAK ENGLSH PLEASE انا : دوم يارب المهم ما بي اكثر عليتس انا وحدتن ناويه ابلغ عن اهلي ( ) : طوووووط طوووط احم انا : يالله اجل مع السلامه يا بعدي <<< عاش مصرف يوم سكرت السماعه واتلفت ادورهم ما لقيتهم قلت الله يستر بس ذولا جاهم اميتاب انهبلوا اجل لو يجيهم خالد الملا وش يسوون؟ <<< يطقهم الزار رحت ابحث عنهم بكل مكان هنا ولا هنا ابد فص ملح وذاب<< اقدره ذا المثل احس ان له ريحة طبخ المهم اني قعدت انادي انادي واركض والدنيا ظلام ومطر وبرق وشمس حارقه واصوات صرااخ وفيه عناكب تمشي بنفس طريقي<<< امس شايفه فلم ذا لورد اوف ذا رينج بديت اصارخ الا وذاك كف الحلاقه الي على راسي طااااااااخ (.....) :وجعه اسكتي يامال الشام ان شاء الله فضحتينا عند الجيران ولا هذي امي وهذا انا بالسطح وجايتني ضربه شمس اليمه قلت انتم وينكم رحتوا مع اميتاب وخليتوني قالت اميتاب والله من ياخذ قذلته لاخيي الزاحف الاقرع<<< العقده مشتركه عندها وعند امها ما علينا الحين انتي وش فيك الحين ؟..؟ اناديك لي ساعه ولا تردين اثر الشمس عاملتن عمايلها عليك يالله تعالي احط لتس زيت زيتون يابنيتي لااااااااااااااااااااااااع الا هذا لااااااااااااااااااااااااااع وبكذا الخص لكم عقدة زيت الزيتون الي فيني <<< ما بغيتي تلخصينها وتخلصينها ويالله لا تنسون اذا عجبتكم القصه لا تبخلون علي بالردود قبل التصويت يعطيكم العافيه اختكم \ الزيـــــــــــــ نجدي ــــــــــــن[/align]